معاك ولاعة؟

الاهداء بإختصار: مينا دانيال. 

مالك؟ أيوة انت مالك في ايه؟ ده بيكون احساسي و انا بقرا نص ال status updates على ال timeline . عارفة ان كلنا عندنا مشاكل و مصايب كمان .. و حاجات متدبسين فيها مش بإيدنا و اتعكينا و حاجات عكيناها بنفسنا و ندمانين و كل أنواع العكننة ... بس ايه يعني المشكلة اللي انت عايشها دلوقتي دي مقدارها ايه بالنسبة لعمرك كله؟ السنة اللي جاية حتكون فين ؟ طب بعد خمس سنين ؟ حتكون لسه موجودة؟ آه؟ طيب و الثلاثة الذين خٌلفوا ؟ ايه؟ تعالالي بأة

الغزوة كانت تبوك .. و التلاتة كانوا مرارة بن الربيع و هلال بن أمية و كعب ابن مالك .. كل واحد فيهم تخلف لعذر في نفسه .. أو حجج بمعنى أصح ؛ و مش ده موضوعنا .. لما سيدنا النبي رجع من الغزوة راحوله يعتذروا .. اسفين يا رسول الله .. مكنش فيه عذر صادق و احنا تخلفنا عن الجهاد ... التلاتة دول كان عقاب ربنا ليهم اربعين يوم محدش بيكلمهم .. هو ده المهم؟ لأ .. المهم ان رسول الله مش بيكلمهم! .. و الأهم .. ان ده بأمر من ربنا ... يعني هما مش شاكين ان ربنا غضبان منهم دول متأكدين! حاسين بكمية اليأس اللي ممكن ده يعمله فـ حد؟ على جنب كده فيه ملحوظة صغيرة .. هلال ابن أمية ده كان نوعا ما كبير في السن و ده سُمح لزوجته تفضل معاه عشان تخدمه على عكس الاتنين التانيين زوجاتهم أُمروا يرجعوا بيوت أهلهم ... ايه؟ مشكلتك لسه أكبر من ده؟ طب هما حالتهم النفسية كانت ايه بعد أول عشر أيام ؟ ....... طب بعد شهر!

خلونا نراجع الآيات كده " وَعَلَى الثَّلاثَةِ الَّذِينَ خُلِّفُوا حَتَّى إِذَا ضَاقَتْ عَلَيْهِمُ الأَرْضُ بِمَا رَحُبَتْ وَضَاقَتْ عَلَيْهِمْ أَنفُسُهُمْ وَظَنُّوا أَنْ لا مَلْجَأَ مِنَ اللَّهِ إِلَّا إِلَيْهِ ثُمَّ تَابَ عَلَيْهِمْ لِيَتُوبُوا إِنَّ اللَّهَ هُوَ التَّوَّابُ الرَّحِيمُ "

الفرق كبير اوي بين تخلفوا و خُلفوا ! طب هما ليه خُلفوا ؟ و لما جه العفو الرباني ليه تاب عليهم الأول .. و بعدين ليتوبوا ؟ و الا هما اللي عملوا الخطوة الأولى لما " ظنوا" _ و الظن هنا يفيد المعرفة _ أن لا ملجأ من الله الا اليه زي ما قال سيد قطب _رحمة ربي عليه_ ؟ يا ترى عرفوا كده لما فهموا ان نائب الفاعل هنا مش صدفة ؟ و ان ربنا بيعلم بيهم أمة .. معرفش .. الاحتمالات لا نهائية و كلها رحيمة اوي .. 

ما تسيبوا ربنا يعلمكوا ... الرب يربّي ... هو حد يطول؟

عزيزي القاريء حبيبتي اللي سايبة المواعين و قاعدة تقرا :D

حبّوا نفسكوا الله يخليكوا .. و بعدين حبوا اللي انتو عايشينه مهما كان صعب .. ادينا بتعلّم و نترقّى .. لو قادرين تغيروا ابدأوا .. و لو مجبرين على حاجة متخلوهاش تدمركوا .. انت اللي باقي لنفسك ؛ انت أهم علاقة في حياتك .. انهرده من كتر ما بفكر في الموضوع ده كنت حصلي المغرب جماعة جهراً أنا و نفسي #حدث_بالفعل اتعلموا الصدق مع نفسكم من الثلاثة الذين خُلفوا .. و الصدق مع ربنا .. اطمئنّوا لأقداركم عشان محدش بيحبكم قد اللي مقدرها .. و متزعلوش من المواقف اللي مجبرين عليها .. لعل نزع الاختيار أحلى اصطفاء من ربنا عشان هو اللي يختارلكم .. لا تلعن الظلام و لكن أوقد الشمعة لو معكش ولاعة.. اشحن الكشاف .. ان شالله فلاش الموبايل .. و ان كان رأيي ان الله نورٌ على نور ,, و جواك نفخة من روحه ؛ يبقى لو شايف ظلام محتاج تقرب من روحك

مفيش أحسن من كلام رسول الله أختم بيه كلامي .. تفائلوا

أحبوا الله من كل قلوبكم ، ولا تملوا كلام الله وذكره ، ولا تقس عنه قلوبكم ، فإنه من كل ما يخلق الله يختار ويصطفي ، قد سماه الله خيرته من الأعمال ، ومصطفاه من العباد ، والصالح من الحديث ...